يــا الــغــفّــار
************************************************
يا الغفار اغفر ذنبي**يا العالم عن قلبي
قاصدك ترحمني وانت الرحيم**وكريم وتواب
**************
جال فكري فالدار الفانية**وفاهمها تسبي
من تبعها تاعب نفسو وزاد** لمحاين ولعذاب
لا تآمن شي فالدنيا تقول**ملكي من كسبي
كل شي دالغني رب الاشيات**وانت راك سباب
فيق من نومك وتوكض وصيغ**قولي يا قلبي
دير زادك هي التقوى وطيع**لجليل الوهاب
تب وارجع وانطق وقول ليك**شاكي من ذنبي
طالب عفُوك أمول الجود**يا الراحم باللي تاب
*****************
آه عني فعلي ناقص**بالخطا قََوي ذنبي
حملت عن كهلي شلاَّ ما نطيق**ونعيَّطْ مكتاب
آه عني ما صنت وقات**ما تنبهت لعيبي
لا صديق رشدني ونقول جاد**هذا من لحباب
آه عني كيف المعمول**يوم يستاوى جنبي
صرت وحدي ويجيوا اهل السؤال**كي نعمل فجواب
آه عني شفت حياتي منام**وتقوَّى عجبي
ولحباب اللي كنت عشيرهم**صاروا كاع تراب
*****************
آش قدَّمْت ياراسي**والرحول اعلم شيبي
وين زادك ما بين الزاد**ياك سبقوك الركاب
آش قدَّمْت ياراسي** فيوم نبعث من تربي
والخلايق فالمحشر واقفين**وتراجي لحساب
آش قدَّمْت ياراسي** فيوم يتقوَّى رعبي
يوم خمسين ألف سنة**جول وطَّالع لكتاب
آش قدَّمْت ياراسي** وصايتي:كون متربي
فباب جود الغني نادي**وقول يا رب الأرباب
****************

يا الغني نسعى فضلك**جود لي وانت حسبي
ونعم الوكيل أسيدي تروف**يا عاتق لرقاب
يا الغني نتوسل بك ليك**توفّي لي رغبي
استجب دعايا وارحمني وجود**يا نعم الوهاب
يا الغني فيك رجايا**وطالبك تقبل طلبي
بالشهادة تكرمني فلختام**ننجا من لعذاب
يا الغني عَجَّلْ بعفُوك**ليك كرّيت بذنبي
باسط كفوفي من قلبي نقول**فالضي وغيهاب
****************
ليك نتوسل يا ربي**بجاه لحبيب العربي
ولامّْتو وازواجو لمطهرين**والعشرة لصحاب
ليك نتوسل يا ربي**بجاه نور ضيا هذبي
والرسل الكرام وبلجراس**وبلامة لقطاب
ليك نتوسل يا ربي**قريب فاجي لي كربي
تَبَّتْ يقيني ..بيميني نريد**ياتيني لكتاب
ليك نتوسل يا ربي**تفُكِّ جسمي من تعبي
دخيل بالسجَّاد والعبَّاد**زكت فنبيك الأواب
*****************
هاك يا حفاظي فن اللفاظ**فتراجم وهبي
صول وافخر بالتقوى يا لبيب**والصدق والاداب
بالعطور سلامي نهديه**فاح بالمسك الطيبي
لاهل المعنى والطلبة ولشراف**من(صيلْ) المجتاب
كل من سال على أسمي** تبينو وبهى نسبي
ليس يخفى للي هو فهيم**وفصيح فلجواب
احمد اسمي وسلا رسمي**ودين الاسلام مذهبي
جميع من قال طرابلسي**نجاوبو هذا لقب
جول واروى وافهم لوزان**هاك سقوة من شربي
كيف قلت بقلبي نوصيك **قول من قلبك ..توهب
فباب جودك نضرع بالخشوع**يا عالم وهبي
فكل حين نتوسل ليك بالنبي**وبالآل والاصلاب