مدونة السير..

[زيد الخير]

السلام عليكم ورحمة الله وبركاته

مدونة السير..

عرفتو المشكل فالمغرب أشناهو؟ المشكل هو أن الناس اللي مسئولين فيه ما عايشينش معانا, ولا كيديرو راسهوم ماعايشينش معانا, وهاد الشي بالضبط اللي كيدير لينا كريم غلاب, وزير التجهيز والنقل, اللي باغي يفرض المدونة ديال السير ديالو صحّا..
إيلا تدارت المدونة آش غادي يوقع كاع؟ غادي يولي الشيفور ولد الشعب فعيواض مايفاسرها مع البوليسي ب 100 درهم, غادي يولي يفاسرها ب 500 درهم, أما هادوك الألبة وولادهوم وصحاباتهوم راهوم مكيوقفوهومش البوليس, هادي بلا منهضرو عليها.
الوزير "غلاب" فرحان بالمدونة ديالو, وبغا زعما يدير سميتو من بعد ما دار لاباس و مابقا عندو ميدّار, أسيدي يدوز الوقت فهاد الشي ماكاين باس, ولكن شوية ديال التخمام عوتاني , حيت المشاريع راها كتدار من بعد دراسة عميقة للواقع اللي غادا تطبق فيه,واللي ماعارفين عليه الناس اللي لفوق والو, الطريق كلها حفاري, مكيحسوش بيها الكاتكاتات ولكن الإير سانك كيتهرس ليها الهيكل, تنشنيشة ديال الشتا كتولي خصك تقطع الشانطي سباحة حرة, الطاكسيات والطوبيسات فاتت مدة الصلاحية ديالهوم بسنوات, مكيديروش لا فيزيت, الرشوة ولات مسألة طبيعية عند البوليس ديال الطريق, الطاكسيات كيحطو واحد الثمن يوميا بزز فالبوسط ديال البوليس ,5 دراهم, ويخرجوه من لكليان طبعا, وفاللخر كيكول ليك المدونة, وطبقو القانون عاد شوفو المدونة..
فاش يولي القانون يتطبق على الكاتكات والدّاسيا, ويولي كي بناني كي المزكيطي, و يولي قناص تارجيست ما يلقا ما يصوّر, و يولي البوليسي يدير ليك محضر إهانة رجل شرطة إيلا بغيتي تعطيه لفلوس, والطاكسيات نقيّين والطريق مسرّحة, ديك الساعة, آرا ليا المدونة , أمّا دابا أسي كريم غلاب, دور وصفّر وبدل ساعة بخرا, معرفتش علاش محيدوكش فالتعديل الحكومي؟

مقتبس من موقع "تريكيل"

[أم آلآء]

وعليكم السلام ورحمة الله وبركاته
بارك فيك الباري سيدي زيد الخير، حسبنا الله و نعم الوكيل، الدرويش مسكين اللي كياكل العصا .
عودة محمودة،و مزيدا من العطاء.

[المداح]

السلام عليكم ورحمة الله وبركاته

هادشي كولو صحيح،

و زيد على الشي المصيبة ديال الخضرا اللي ولات كاتكوي، الماطيشه ولات كادير 140 ريال (7 دراهم) الباطاطا، البصلة .... هادو غير الضروريات

و هادشي كولو من المدونة اللي نقصات ليهم الطوناج و رفعات من العقوبات للي ما احترمش الوزن المسموح به
فالأخير المسكين اللي كاياكل العصا

حسبنا الله ونعم الوكيل