المروزية

[همسة قلم]

السلام عليكم و رحمة الله تعالى و بركاته
اليوم بغيت نقدم ليكم الوصفة ديال المروزية صراحة هي ساهلة بزاف و لذيييذة !!! بلا منطول عليكم، ها هي المقادير:
* لحم العنكرة أو الملج حتى هو كيجي لذيييذ
*3 بصلات كبار مشلضين
* راس ملعقة سمن الحر
*شوية زعفران حر،أو الضامة ديال زعفران
* 1/2 ملعقة صغيرة عطرية المروزية (كتباع عند العطار)
*1/2 ملعقة صغيرة قرفة +عويدات القرفة
*1 ملعقة كبيرة زبدة
*1/2 كاس زيت بلدية
* عسل أو سكر
* ملح، بزار، سكين جبير، خرقوم
* زلافة زبيب بلا عظم منقوع في الماء ساعة
* زلافة لوز مسلوق منقي و مقلي

ناخد السمن + العطرية وندهن به اللحم, من الأحسن نخليه يترقد فيه شي نصف ساعة ثم نضعه في الكوكوت . نضيف البصلة ونخليه يتقلى على نار هادئة. ثم نضيف الماء الكافي باش يطيب لينا اللحم مزيان مزيان !!!!وقبل ما نسد، نزيد 2 ملاعق كبار عسل باش اللحم تدخل فيه الحلاوة ديال العسل أثناء الطهي !!!

بعد ما يطيب اللحم ، نزولو من الكوكوت، و نضيف الزبيب للمرقة ، نزيد شوية القرفة، و العسل أو السكر حسب الذوق ونخليه يتشحر. منين تبدا المرقة تثقال، نرجع اللحم للمرقة باش يتشرب هاديك لاصوص لمعسلة على نار جد مهيلة ( هههمم و شحال كتكون الرويحة كتشهي !!!!)

من بعد ما تشحر مزيآآن و تعسلات لاصوص نطفي العافية

في طبق التقديم، ننزل طريفات اللحم في الوسط، البصيلة و الزبيب معسلين فالجناب ثم الكثير الكثير من اللوز المقلي من الفوق.


بالصحة والراحة ونتمنى تعجبكم !!!

[أشرف]

السلام عليكم ورحمة الله وبركاته

بارك الله فيك

وصفة مغربية أصيلة ومن ألذ أطباق العيد السعيد

[خادمة الحبيب]

السلام عليكم ورحمة الله وبركاته

الله يعطيك الصحة اختي غزلان

هي بلا مانطيبها هاد العام نجي ناكلها عندك ان شاء الله

[دمعة حنين]

السلام عليكم ورحمة الله وبركاته

مبروك عيدكم بكل ما تتمناو ان شاء الله
تبارك الله اختي غزلان وصفة جات في وقتهاالله يعطيك الصحة
اختي خادمة الحبيب ماتنساينيش ملي تكوني غاديا تاكليها عندها عافاك نمشي معاك

[عابرة سبيل]

السلام عليكم ورحمة الله وبركاته

اممم اعطاك الله الصحة اختي غزلان

[همسة قلم]

الله يكرمكم وينوركم ويخليكم لية

إوة مرحبا بكم ألف مرحبا ويلا مهزتكمش الدار تهزكم رموش عينية

نخاف غي منكونش في المقام لتستحقوه

[دمعة حنين]

ترحب بك الجنة و نعايمها ان شاء الله اختي غزلان

[همسة قلم]

amine yarab al"3alamin
allah ykarmak lala ibtissama mochre9a