حكاية المخزن ومجالس العدل و الاحسان
حكاية المخزن ومجالس العدل و الاحسان
هذا السكيتش من اعداد الفنان تميرة
اللقطة 1 أمام بيت النصيحة :
عون يراقب مجلس النصيحة فيكلمه رئيسه في الطالكي ...
عون : سيدي احنا فالاستماع .. كنتصنتو وكنراقبو وكانحضيو وكانتسناو غي الأمر من سيادتكم باش نقتحموا البيت ديالهم .. حول
رئيس : شنو كايديرو دابا ؟ .. حول
عون : كانوا كايقراوا القرآن نعام أ السي وقراءة القرآن فهاد الوقت بدعة وكل بدعة ضلالة وكل ضلالة في النار ... حول
رئيس : لا النار بزاف عليهم جيبهم غي للكوميسارية ولكن خليهم حتى للوقت للحاسم باش تشدهم متلبسين ... حول
عون : باينين لي كلهم متلبسين كلهم لابسين الفوقية ... اهدا اهدا اهدا .. سيدي ناضوا كاملين كلهم وقفوا ... واقيلة غادي يهجمو علينا .... لا لا لا كيقيمو الصلاة .. وجهرا ... ياك المغرب كايتصلا سرا ؟
رئيس : اسكت ألمكلخ راهم كايصليو العصر ... خليوهم غير يقولو السلام عليكم .. قولو ليهم انتما عليكم السلام . وجيبوهم يصليوا النوافل هنا .. ينوروا لينا هاذ المكان وماتنساش جيب معاك شوية ديال البخور باش مايسحروناش ...
عون : واخا نعام أ السي كون هاني ...
اللقطة 2 : في كوميسارية الرحمة فالله في مكتب السيد المسؤول الأمنين ( منين زعمة) .. ههه يدخل العون برفقة الأخ المسؤول يحمل بعض متاعه ليعرضه على مسؤوله .
العون : هانا أمون شاف راه جبنا 155 .. كاين اللي جبناهم فالسطافيط وكاين منهم اللي جابونا فطوموبيلاتهم ... ماعرفتش أنا هاد الناس كيدايرين ؟
المسؤول : ياك ما دعاوك أمسخوط الوالدين بان لي كاتمدحهم ..
( يلتفت إلى الأخ ) النص ما لقا فين يسكن وانت فاتح ديك الدار داير فيها التجمعات .. شنو كنتو كاديرو
الأخ : كنا كاندكرو الله ونقراو القرآن ونصليوا على النبي .. كنا فمجلس النصيحة
العون : هادي هيا اللي سمعتهم كايقولوها . مجلس النطيحة
المسؤول : اسكت أنا كانهضر دابا ... تكلم أ السي فلان دايرلي فيها أبو هريرة ... أرا نشوف داكشي اللي جبتي معاك ديك الشانطة شنو فيها ؟
( يفتح العون حقيبة كبيرة فيبدأ بإخراج بعض مستلزمات الأخ )
العون : هادا كتاب الأربعين النووية
المسؤول : ألطيف كاتعاملو بالنووي ؟ هندكم علاقات مع إيرانيستان .
الأخ : الله يهديك راه الأربعين النووية كتاب ديال الأحاديث
المسؤول : زيد اجبد نشوف .. شنو هاداك عاوتاني ؟؟
العون : هدا تفسير ابن كثير
المسؤول : شكون هاد بن كثير ؟؟ اعترف
الأخ : ابن كثير راه مفسر
المسؤول : فين كايسكن ؟
الأخ : فدار بوعزة ... بن كثير راه عالم واش ماكتعرفوش .. ؟؟
المسؤول : ماكنعرف لا بن كثير ولا بن قليل .. زيد زيد فل شوف شنو كاين ..
العون : هذا كتاب سميتو الصارم البتار ... هذا بحال الرزة المزدوجة ..
المسؤول : الصارم البتار .. كيفية صناعة الأسلحة والصواريخ المسيلة للدموع .. مزيان ...
العون : نعمر لو المحضر
المسؤول : عمر
العون : باش غادي نعمرو ؟
المسؤول : عمرو بالبصلة والزبيب .. عمرو بداكشي اللي خاصو يكون تما .. مالك مكلخ ..؟
الأخ : حسبنا الله ونعم الوكيل
العون : ( يقترب من الأخ ) آش قلتي .. ؟ والشاف قالك انت حسبنا الله ونعم الوكيل .. عرفتي غادي تموت .
المسؤول : الله يستر .. تيرا فيا ولا ؟
العون : الله يرحمك أ الشاف مشيتي ..
المسؤول : هزو ديه صورو وردو ليا لهنا
العون : نخرج التصويرة ولا نديرها غي الفلاش ديسك ؟؟
المسؤول : وا صورو وديرلو محضر
العون : وشنو التهمة ؟؟
المسؤول : ذكر الله بدون ترخيص ...
رد مع اقتباس
