وصفات برنامج اللقاء المفتوح

[خادمة الحبيب]

بناشي بالفرماج :

1/2 حليب
2 قطع فرماج مربع
كاس يوغورت مسوس
كاس عصير البرتقال
سكر حسب الذوق
يخلط الكل في الخلاط و يقدم باردا.

[line]

عصير

2 بطاطس مسلوقات و مقشرات و مقطعات
.. خزوات
1 لتر لبن
1 لفاني
يوغورت بنان
1 قطعة فروماج مربع
سنيدة حسب الذوق

يخلط الكل في الخلاط الكهربائي و يقدم باردا

[خادمة الحبيب]

بطاطا سريعة التحضير

1 خزو محكوك
1 كرعة محكوكة
1 بصلة مشلدة
1 م ك زبدة
م سكين جبير خضر
2 ضرس ثومة
ملح ابزار سودانية
بيضة
راس م ص بيكاربونات صودا
4 بطاطا كبيرة محكوكين و معصرين من الماء مزيان

ناخدوا البصل نحمروه فالزبدة مع سكين جبير و الثوم
ثم نضيفه الكرعة و خزو و التوابل و نتركهم يتشحر
ثم نضيفو الخليط للبطاطا و البيضة و البيكاربونات
نخلطوهم مزيان و نعمروا بيهم كواغط الحلوة و نعملوا عليهم الفروماج و ندخلوهم للفرن متوسط 15 الى 20د

[خادمة الحبيب]

بطاطا معمرة في الفرن

المقادير

4 بطاطات كبار (من الاحسن تكون بيضا )
شوية جلبانة
2 خيزوات مقطعين مكعبات صغار
معدنوس مقطع
فرماج محكوك
صوص بيشاميل
بزار ملح
لاشابلير(تقريبا ثلاثة معالق كبار )

نغسلو البطاطا مزيان و نخليوها بقشورها ثم نلويوها في ورق الالمنيوم و نشويوها في الفران
ندخلو فيها السكين باش نشوفو واش دخلها الطياب و نخرجوها ما تطيبش بزاف
منين تكون البطاطا في الفران نصلقو خيزو و الجلبانة مع شوية الملح ثم نصفيوهم
نقسمو البطاطاعلى جوج و نخويوها شوية بملعقة صغيرة
نخلطو البطاطا اللي زولنا مع خيزو و الجلبانة و شوية الملح و البزار و المعدنوس و صلصة البشاميل ونعمرو البطاطا ونرشوها بلاشابلير ثم نديرو فوقها الفرماج محكوك و ندخلوها للفران غير يذوب الفرماج ويتدهب اللون ديالها ونخرجوها ثم نقدموها بالصحة و الراحة كتجي غزالة خصوصا للعشاء

[خادمة الحبيب]

صبيعات بالكفتة و الخضر في الفرن

المقادير

رابعة كفتة
قزبر و معدنوس مقطعين
بزار سكين جبير ملح راس ملعقة صغيرة قزبر يابس مدقوق
رابعة بطاطا مقشرة و محكوكة رقيق و معصرة من الماء
رابعة خيزو مقشر ومحكوك رقيق و معصر
بصلة متوسطة محكوكة في الجهة الغليضة ومعصرة من الماء
بيضة
ربع كاس عنبة زيت مائدة

الطريقة

نخلطو كل المقادير اللي عندنا مزيان و نديرو منهم صبيعات او كويرات ونديروهم في لاطة مدهونة بالزيت و ندخلوهم للفران يطيبو ثم نقدموهم بالصحة و الراحة
هده المقادير كتعطي نصف كيلو
الا بغينا نديروهم طجين كناخدو الطجين نديرو فيه شوية زيت بلدية و نستفو دوائر بصلة و مطيشة ونديرو فوقهم الكويرات ديال الكفتة و الخضر ونغطيوهم بدوائر البصلة و مطيشة و نرشو من الفوق بالتوابل ونديروهم يطيبو على نار مهيلة دون اضافة الماء و بالصحة والراحة

[خادمة الحبيب]

حلوى القرمود les tuilles

المقادير

بيضة (نعبروها ونديرو نفس الوزن ديالها من المقادير الاخرى )
نفس وزن البيضة طحين
نفس الوزن زبدة مذوبة
نفس الوزن سنيدة

الطريقة

نخدمو سنيدة و البيض بالفورشيت ثم نزيدو الزبدة و نخلطو ثم الطحين و نخلطو مزيان و نخليو الخليط يرتاح خمس دقائق
ناخدو لاطة نفرشوها بالورق الخاص و نبداو نهزو شوية من الخليط بالملعقة ونحطو على شكل دويورات و نبسطوهم شوية بظهر الملعقة ثم ندخلوهم لفرن متوسط الحرارة يطيبو غير تبدى الحاشية ديالهم تحمار نخرجوهم و نديروهم بسرعة قبل ما يبردو فوق المدلك باش ياخدو الشكل ديال القرمود او يمكن نديروهم في القوالب الخاصة اللي كتباع و يمكن نلويوهم على جعبة ديال الحرير باش نحصلو على شكل سيكار
خصنا ندخلو غير كمية صغيرة للفران باش نتحكمو فيها قبل ما تبرد حيت غدي تقصاح ومايمكنش لينا نشكلوها كيف بغينا في هذه الحالة خصنا نعاودو ندخلوهم للفران شوية باش يرطابو ثم نخرجوهم و نشكلوهم

[خادمة الحبيب]

سمك الصنور بطريقتين طجين و قطبان

المقادير

ديال الطجين و البروشيت

2حتى ل3 كيلو من سمك الصنور (الطراف ديال الكرش اللي ما فيهمش الشوك نقطعوهم مربعات لتحضير القطبان و جهة السنسول نقطعوها دوائر للطجين )
4 ضروس ثوم محكوكين
عصير نصف حامضة
ملعقة كبيرة كمون
شوية زيتون بلا عظم
ملعقة صغيرة كبار مرقد capres
ملعقة صغيرة سكين جبير
2 معالق كبار تحميرة
شوية البزار
ملعقة صغيرة مطيشة الحك
3 مطيشات مقطعين دوائر بقشورهم
ملعقة خرقوم
زعفران شعرة
ملح
6 اوراق سيدنا موسى
كاس زيت المائدة
كاس كبير ماء
6 عويدات قرنفل
بصلة محكوكة
2 خيزوات مقطعين دوائر
قزبر و معدنوس مقطعين
عويدات كرافس + عويدات معدنوس نفرشوهم للطجين

الطريقة

القطبان

في اناء نديرو البصلة محكوكة + ملعقة صغيرة بزار + ملعقة كبيرة قزبر و معدنوس + ملح + كمون +ملعقة كبيرة تحميرة + زعفران شعرة و نشرملو القطبان و نخليوهم مرقدين فالشرمولة في مكان بارد

الطجين

نفرشو عويدات الكرافص و المعدنوس و اوراق سيدنا موسى و القرنفل في الطجين و نستفو خيزو و نشرملو دوائر السمك مزيان بخليط الكمون و التحميرة و الخرقوم و الثومة و عصير الحامض و سكين جبير و ثلاثة ارباع كاس الزيت ثم نستفوهم في الطجين و نخلطو كاس ال
ماء مع مطيشة الحك و نصبوه فالجناب ديال الطجين ثم نديرو الفوق دوائر مطيشة و الزيتون و الكبار و نرشو بالقزبر و المعدنوس ويمكن نديرو حتى الحامض مصير ثم نديرو الطجين يطيب فوق المجمر ديال الفاخر نخليوه يشرب مزيان تقريبا نصف ساعة
منين يطيب الطجين نصفيو مكعبات السمك اللي رقدنا فشرمولة ثم نزيدو عليهم ربع كاس ديال الزيت اللي بقى لينا و نديروهم فالقطبان و نشويوهم على الفاخر و نقدموهم

[خادمة الحبيب]

flan بالبيض

المقادير

5 بيضات
5 معالق كبار سنيدة
نصف لتر حليب
5 معالق كبار نيسلي
2 معالق كبار ماء + ملعقة كبيرة سكر للكراميل

الطريقة

نديرو الماء و السكر في المول و نديروهم فوق النار باش يولي عندنا كراميل و ندورو المول باش يتغطى كامل بالكراميل (يمكن نزيدو السكر و الماء على حسب حجم المول ) ثم ندخلوه للمجمد يبرد
نخلطو البيض و السكر و الحليب و نيسلي في الخلاط الكهربائي ثم نصب الخليط في المول فوق الكراميل و نديروه في حمام مريم و ندخلوه للفران يطيب ونجربو بسكين الا خرج ناشف راه طاب
اللي ما بغاش يطيبو فالفران كاينة طريقة ديال الكوكوت كنديرو شوية الماء في الكوكوت و نحطو
المول ونديرو قشور البيض في الماء باش ما يفيضش على المول ثم نسدو الكوكوت و نحسبو ربع ساعة بعد الصفارة و نخليوها تبرد ثم نحلوها و هاهو الفلن واجد كيجي ممتاز طبعا نديروه يبرد في الثلاجة و نقدموه بالصحة و الراحة

[ريحانة الاسلام]

السلام عليكم ورحمة الله وبركاته

ما شاء الله عليك

بارك الله فيك اختى على الوصفات الرائعة


سلمت يداك

[خادمة الحبيب]

و فيك بارك المولى عز و جل اختي ريحانة و مشكورة على المرور الطيب

[خادمة الحبيب]

الروز بالفروماج

المقادير

* 1/4 روز كلاصي مسلوق
*3او4 خيزو على حسب الحجم محكوك في الحكاكة الرقيقة
* بصلة مشلضة رقيقة
* 2 فروماج
* شوية الملح
* شوية ابزار
* شوية زيت او زبدة

الطريقة

نشحروا البصلة في الزيت او الزبدة حتى ترخى ثم نضيف خيزو ونبداوا نحركوا حتى نحسوا به داب نضيفوا شوية ديال الملح والابزار ثم نضيفوا الفروماج ونحركوا بعد دلك نضيفوا الروز ونحركوا مزيان حتى ينسجم الخليط . كيجي لونوا سومو غزال والمداق لديد.

[خادمة الحبيب]

بريوات بمذاق مالح و حلو

المقادير

رابعة كفتة
بصلة صغيرة محكوكة
شوية الملح
راس ملعقة سكينجبير
2 معالق كبار معدنوس مقطع رقيق
كاس زبيب بلا عظم مرطب في مازهر و مصفي
كاس لوز مصلوق و مفسخ ومنشف( ندهنوه بالزيت و نحمروه فالفران ثم ندقوه بالمهراز من الاحسن)
نصف ملعقة كبيرة مازهر
شوية القرفة مطحونة
ملعقة صغيرة سنيدة
2 معالق كبار زبدة
حكيكة صغيرة ديال الكوزة
رابعة من ورقة البسطيلة

الطريقة

في مقلة فوق النار نديرو البصلة مع الزبدة والملح و نخليوها ترخى شوية ثم نضيف الكفتة و نشحروها مزيان و في الاخير نضيف المعدنوس و الكوزة و سكينجبير و نحركو و نزولوهم من فوق النار
نديرو الزبيب في مقلة مع شوية القرفة و شوية سنيدة و نحركو شوية فوق النار ثم نزولوه و نخلطوه مع اللوز و العناصر الاخرى ثم نعمرو البريوات و ندهنوهم بالزبدة مخلطة مع الزيت و ندخلوهم للفران يطيبو و عند التقديم نزينوهم بالقرفة والسكر او بالعسل مخلط مع القرفة و نقدموهم سخان بالصحة

[إسلامية الفاروق]

يا عيني عليكي يا اختي خادمة الحبيب


وصفات رائعة ان شاء رراح اجرب منها

[عابرة سبيل]

السلام عليكم ورحمة الله وبركاته

تبارك الله عليك اختي
وصفات شهية ان شاء الله نجربها

[خادمة الحبيب]

الله يبارك فيكم اخواتي الغاليات و مشكورات على المرور الطيب

[OMO ABDOU]

Ana 3odwa jadida atamana an akouna moucharika moustafida wa moufida